Fahrerlebnisse

wär mi kennt weiss, das i es sunnigs gmüet ha. hüt isch mer aber o das churzfrischtig abhande cho. i ha mini fahrschülere i empfang gno u ihre lachend es paar müschterli vo üsne verchehrsparnter verzeut. mit em spurch, si söu hüt bsungers ufpasse, es heig chli komeschi vögu ungerwägs, simer gstartet. chum losgfahre, heimer di erschte velofahrer vor üs gha. nid öppe hingere- sondern näbenang si si gradlet. mini fahrschülere seit churz u knapp .... ehhh i warte no grad mit überhole, i gsehs grad nid so guet. für mi der richtige entscheid.... lehrt me doch ir usbiudig zum thema überhole..."im zweifel nie!" chum es paar sekunde vergange, wärde mir vomene grosse, schnäue, graue fahrzüg überhout...ds überhole ellei längt nid... nenei "herr" het ono müesse zeige dass a däm outo es hupi isch  u zu auem übu isch o das no nid gnue gsi... vor üs ineboge het "herr" di rächti hand i d luft gstreckt u üs der mittufinger zeigt.

derzue gits ds säge, das mis outo dütlech, mit "fahrschule" agschirbe isch u ono das bekannte blaue L dranne chläbt. jede einigermasse normau sehend u dänkend mönsch gseht, das da drinne äuä chum e rutinierte länker sitzt. mir hei üs i däm momänt no nid witer la beirre, si witergfahre zum scherzligchiuchli füre u lue da... ds vorderscht ar rote ample steit er, der "herr" u mir itse hingerdranne. was när isch cho isch defintiv ds viu gsi. hoppla "herr" e blick i innespieugu, rächti hang ufe, mittufinger i d höchi gstreckt u üs so zum zwöite zeigt, was är vo üs dänkt. potztusig... da hets de o mir churz der nuggi usegjagt. e fräche cheib, hani gwätteret, mis natel zückt u mau es föteli vo däm "herr" u fahrzüg gmacht. ehhh ja, nimmt mi schliesslech wunger was das fürne mönsch isch, wo sich so dernäbe verhautet! (googel sei dank weisi its chli öppis über ihn.)

das mit em foto hingäge het däm eutere "herr" nid passt. är isch förmlech zum outo us gumpet, mir ergeuschteret cho erkläre mit wäm i da uf de strasse darf fahre u mit wäm nid. herr isch zrugg zum outo gstampfet u losbruset.

derzue ds säge gits, dass mini fahrschülere flott u überleit ungerwägs isch. si het der vku bsuecht u dert z.b.glehrt, dass me nid söu überhole weme zwifu het u ono öppis angers wo im strassevercher wichtig isch. TOLERANZ.... dä kurs het "herr" zu sinere zyt leider no nid müesse bsueche, i bi überzügt, dä hätt o ihm sicher guet ta! ines paar jährli, wes bi ihm nüm so schnäu geit, isch o är villech de froh wes chli toleranti lüt ungerwägs het!

häbet e guete tag u bis gli!

mit eim fahrschüler isches scho no wichtig u nötig gsi, dass mer di viele signau wos da git im strasseverchehr chli besser aluege... i ha gli mau gmerkt, dass di theorieprüefig äuä nume grad hurti i ds churzzitgedächnis isch ga chehre u sech subito wieder uf u dervo het gmacht. bim fahre si da definitiv nüme viu kenntnis umegsi. bim houptstrassesignau isch öppe d antwort cho, das sig es fahrverbot oder es angers mau ehhh das heisst rächtsvortritt. so heimer du wouw oder übu üs o dene verschiedene signau müesse widme. womer so düre waud gfahre si u es signau isch cho wos es tier het druffe gha hani mau gfragt..... duuuu u das, um was geits hie??? d antwort isch cho wi us der pistole gschosse: ACHTUNG RENTIERE! Upsss... ha gar nid gwüsst, dass mir hie o mit so nordische Hirsche müesse rächne. :-)

es angers müsterli wo i di eher truuregi katergorie ghört: I ha e fahrschülere wo mir bsungers a ds härz gwachse isch. i wett derzue säge, si ghört nid grad i kategorie vo de lernfahrer. Si isch bi mir für uffrüschigsunterricht. da mir üs 2 mau ir wuche zum fahre träffe, isch da o e bsungeri fründschaft entstande. leider isch chürzlech ihres gliebte hundeli gstorbe. so het si zum hörer griffe, mir aglüte u mi bätte si mit dem hundeli no uf der letschte fahrt ds begleite, da das tierli immer gärn im outo mitgritte sig. auso hani mer dänkt das machi doch. ghört nid grad zum fahrlehrerläbe aber weme öpperem eso e härzenswunsch  cha erfülle, de bini sicher derbi. so simer du, i fahrend mit ihrem outo u si sitzend uf der schoss ds chörbli mitem hund, gäge kirchbärg zuegstüret u hei das tierli dert für uf si letschti reis chönne abgäh.

samschtig morge 8.00i thun bahnhof....scho i ha grad echli kämpft für denn usem bett aber no dänkt das isch gäbig, weni früh cha afa de chani de o mau i ds wucheänd starte. i ha thun gwartet u gwartet u gwartet.... nach zwöi-drümau telefoniere het de uf ds mau mis telefon tschäderet. er het verschlafe tönt u gseit... hallo chrige i ha verpfuuset. ha der wecker e stung ds spät gsteut. aber los. da i ja di lektion glich muess zahle, chasch du itse sicher grad no uf merlige fahre, bis denn bini uf u agleit u de chöi mer der räschte vor lektion (sage und schreibe öppe no 10 minute!) glich no fahre.

i ha e ufgsteuti fahrschülere wo definitiv aus git für so schnäu wie müglech zum fahruswys ds cho. si isch ds glernte am umsetzte wi der blitz... si isch aber o schüsch chli uf zack ... we eine chli knapp i kreisu fahrt heissts sofort.... hei du bisch e tubu (oder schlimmer!)... oder we öpper vor üs nid grad so schnäu fahrt, (si isch ja schliesslech fahrschülere) de... mannnnnn bisch du e lahmi änte - darfi däm hupe???, het si mi eismau gfragt. Si isch immer chli em kommentiere u ds thema toleranz im strasseverchehr müesste mer äuä nomau aluege. i ha du gseit. lossss la das lasie, das wird nid so gschetzt we du a dire prüefig di angere verchehrspartner so i d mangle nimmsch. so, itse ds letschte mau isch si igstige u het gmeint: für hüt hani mir vorgno mis muu ds haute u nid immer kommentär abds gäh. :-) und siehe da, o das het si wie der blitz tiptop umgsetzt. 

eismau heimer ds kiese im waud d notbrämsig güebt: zwöi drü mau heftig uf d chlötz gstange, witer düre waud gfahre, hingere zum chline kreisu ga chehre. mir fahre i kreisu ine u ir ifahrt rächts vo üs steit a grosse porsche... dir gloubets nid mir si nid um dä würklech chli kreisu umecho scho isch der porschefahrer wäg gsi. är het sech auso grad entschiede der kreisu der anger wäg ds befahre. ehh ja schüsch muess me no hinger emene "L" nachefahre. :-)... sache gits!

vor no nid langer zyt, bini wieder mau i gnuss cho, e eutere herr (knapp 90gi 😀) ufere standortbestimmig beträffend em outofahre dörfe ds begleite. i ha ihn eigentlech ane angeri fahrschueu wöuwe vermittle aber er isch scho em telefon so scharmant u luschtig gsi, dass es mi uf ds mau säuber het wunger gno, was de das so fürne fründleche u gwitzte mändu sig. i bi wi immer chli im schuss u zitlech ufem letschte drücker uf dä parkplatz inekurvet u är isch mit sim chline, bigobello putze wägeli scho parat zum starte i das abentüür gsi. gstrahlet heter über au 4 backe, i ha gmerkt, dass er sech sichtlech fröit, mir its de sini fahrkünscht dörfe vor ds führe. mir si losgfahre u scho im erschte kreisu isch nis eine chli vor d nase inegfahre. ehh isch das its e SCHNUDERI het er troche gmeint. witer het üsi fahrt dür paar dörfer gfüehrt u i bi vo sine perfekte siteblicke totau begeisteret gsi. da chönnt gwüss mäng junge fahrer u jungi fahrerin viu vo ihm abluege. einzig we ig ihm churz öppis erklärt ha, het er mi agluegt aus würde mir visavis amene tisch bim ne apero höckle. da merkt me scho, bimene gspräch isch der blickkontakt i dere generation no wichtig gsi. i ha ne de aube ufgforderet, bim fahre nid mir i d ouge, sondern besser wieder füre uf d strass ds luege. 😂 wo mir de ir stadt si acho ischs richtig kreisu für uf d outobahn gange. bir ifahrt i kreisu hani de churzzitig grad es heftigs ohreflattere übercho. nie hätti dänkt, dass mir no i sone winzegi lücke vorem lastwage inemöge. zum glück isch mir nid no es uiuiuiiiiii oder e angere biischter entwiche, schüsch hätter öppe gwüss no brämset u de wärs de definitiv weniger guet usecho. nachem nahlah vo mim chlupf ure tiptope outobahnifahrt hani ihm über mini nöii bekanntschaft mit emene SCHNUDERI verzeut! mit emene lächle seit er: ehhh ja frou boss, normalerwys würd i nie so knapp ine kreisu inefahre, i ha dänkt, i müess öich öppe no vorführe, dassi ono ine chlini lücke würd ine passe. fazit: heil ufem parkplatz acho, ab sehr viu guetem gstuuhnet aber o wieder mau gspürt, wies für eutere oder angeri fahrbegleiter isch, imene outo ds höckle, wo meh aus handbräms zieh nid müglech isch.

i chas fasch nid gloube - i wirde grosi - u uf das chline gschöpfli fröie ig mi mega, bis wiukomme du chline ärdebürger oder du chlini ärdebürgerin, i bi its scho tüchtig am chinderlieder klimpere, ha ja no grad e chli zyt, so dasses de villech no chli besser wird töne u du hoffentlech o chli fröid a dene "aui mini änteli" u "fuchs du hast die gans gestohlen" hesch.

wies haut so isch, gits vor der geburt meischtens no e hochzyt u uf die müesse mer nid lang warte, das heisst, i muess mis ferieprogramm chli übere huufe wärfe u darf div. termine für die churzfrischtig planti hochzyt wahrnäh....aus erschts isch der coifi agseit. i möcht so gärn es schöns zöpfli u ha e gheimtipp übercho, wo dasi das cha ga la mache. vo letscht bini du i das tööife ämitau gfahre, wouverstange nach navi, schüsch hätti dä härzig coifisalon äuä nie gfunge. d silvia het i mine wisse haar ume gschnipslet u zu mire fröid scho mau es cools probezöpfli gfloche. CHECK DAS PASST!

witer hani mit mim jüngschte suhn, mit em ziu e azug für ihn ds choufe, imene lade, äbefaus im tööife ämitau abgmacht. i bi de fang chli ga nuusche u ga vorsondiere, natürlech bi de frouehandtäsche. wär mi kennt, weiss, dasi e grossi liedeschaft für täsche i aune farbe, grössine u forme ha, weni müesst zügle, chönnti gloub mis ganze hab u guet i dene umefuge. item.... i stah auso i däm lade inne u chume nid drumum, amene gspräch vo 4 verchöiferinne zue ds lose.... "auso die närvt immer", "ja das isch auso ganz e doofi" u "we si de aube chunnt cho ds loufe, de..." und so witer und so fort... uiuiui...i dänke, di müesste äuä ono mau e teambiudigsevent absolviere. i bi de chli hingere gschliche zu de abechleider wo gross u dütlech druffe steit, das me die nume mit bedienig darf abenäh, fougsam wini bi hani nume fang chli gluet, ha ja nid würklech für mi öppis wöuwe choufe. dert im hingerschte eggeli stöh wieder 2 mitarbeiterinne u si zäme am chädere u chifle, aus gäbs kes morn. heinomau isch das hie eigeartig. mi het uf jedefau kenni vo dene froue agsproche, ob si mer äch chönnt witer häufe.... bi ni da fautsch? das wär doch eigentlech ihre job.

sooo äntlech trudlet dä lücu i u mir gö zügig i d herreabteilig. er luegt chli ume u isch relativ schnäu überzügt, dass dunkublau sini farb wird si. e verchöifere ir nöchi ghört das, chunnt u seit schrof - chani öich häufe - ehhhh ja gärn, i sött e azug ha - si luegt provokativ uf d uhr klopfet mit em zeigfinger tou uf ds zifferblatt (es isch notabene 17:45!) u seit hässig - dir sit de ono früh dranne!!!! ächt its, scho wieder so e giftnudle!, geit mir düre chopf u lücu chüschelet - gsesch mude, wäg däm gani nid gärn i so läde :-) da er aber uf ihri hiuf, mit dene verschiedene grössine, bund- u chragewiti, agwise isch, blibt er schön ruhig u zahm. si bringt demotiviert e blazer, streckt ihm dä zackig häre u seit - schlüfet da mau dri, de luege mer de witer! lücu zieht sis trainerjäggli ab und siehe da.... drunger chunnt es dunkublaus t-shirt füre, würklech, vor u hinger drufe si si guet läsbar die paar P-O-L-I-C-E-buechstabe u was its passiert isch nid zum gloube, di agsteuti mutiert innerhaub ere haube sekunde zur "ämmitalere-verchöiferin des jahres 2022". zuvorkommend, höflech, beratend usw., eigentlech genau so wies sött si. der lücu isch zwar immer no der glich tscholi, ob mit oder ohni police-t-shirt aber für tiu lüt mache chleider äbe doch leute! letschtändlech, top bedienig mit schueh u gurt hole, gfüehti 10 schachteli mit verschiedene flöige uf u wieder zueta u aues isch ganz zuvorkommend abglofe. Azug isch em 18:32 zaut worde u aui si ds fride gsi. CHECK DAS PASST!

ps. i wünsche mir zum geburi so es dunkublaus t-shirt mit dene paar buechstabe druffe, es wär villech für tiu situatione no ganz gäbig. :-)

was söu ig de alege? das chleid woni ha wöuwe bsteue isch natürlech i mire grössi (nid 36) wiedermau nid verfügbar gsi, so hani mi de entschlosse ds knaurote la ds cho. i bi dri gschlüfe u bi mer ds erschte mau im läbe wie d "women in red" vorcho. i bi i gedanke dür seftige gstiflet, am bahnhof ufenes grosses lüftigsgitter gstange u ha mis röckli im takt mit em luftzug la tanze. (insider, fium "women in red") mir hets gfaue, das rote chleid, ha mi scho vor mim innere oug gseh mit lippestift u passendem nagulack. dummerwys hani mi aber vo ussage wie - was du wosch rot ane hochzyt? das heisst du sigsch dominat u wöusch dis bubeli nid loslah, bis uf.... wär rot treit, het mau öppis mit em brütigam gha... grins... äuä nid aus mueter! item, di üsserige hei mi de doch chli la verunsichere u uf ds mau het das rote chleid i mim hirni es wirrwarr usglöst. söui, söui nid? für ne, im stärnzeiche waag gebornegi, e schwärwiegendi entscheidig. so hani mi entschlosse no churz e abstächer nach schwarzhüsere ds mache....(wär es chleid suecht u nid nume grad grössi 36 treit, isch der super berate!) mit blute füess u emene make-up hübli ufem chopf (da lachsch di kabut :-)), i ds erschte chleid (weli farb hets äch?) inegschlüfe, hinger am rügge la binge u gwüsst....

CHECK DAS PASST!

mir si ready für a di hochzyt!

nachere schlendertuur dür thun het mi ds schoufänschter vom "ösch fäschon" azoge. so abemene gwüsse auter u o ere gwüsse chleidergrössi ischs haut nüm der "h&m" oder "zara" - dert mögt chuum mi arm ine hoseschlouf vor grössi xl - därum lani das gschider lasi. im ösch hets immer cooli, mängisch aber o chli tüüri chleider. ha gwüss eis jahr dert es wunderschöns wullejäggli chouft, notabene ohni d priisetiggette ds studiere. bi de mit däm prachtsstück a kasse u scho fasch chli bleich worde, wo d verchöiferin het verkündet, wieviu i da müess häreblettere. hmmm, es isch mer fasch nüt angers überblibe, aus die nötli uf e trese ds lege u mer vo däm schock nüt la a ds merke. I ha mer guet igred, dass das jäggli (wo ussert ere wunderschöne farb, de nid öppe spezieu isch gsi) mis eigte geburi, wiehnachts u "weis nid was no aus" gschänk vom nächste jahr wärd si. einzig ere guete fründin hani der priis verrate u i bi gwüss froh gsi, wo das jäggli scho nach paar tag het afa fuusele, so dasi das ohni problem wieder ha dörfe zrugg bringe.

auso i stah wieder vor däm schoufänschter, gwappnet de dis mau der priis a ds luege u bi ine, i das chleider paradies. nach es paar hose hani gfragt u bi hingere zur frou dietrich verwiese worde. im separé het si mi de in empfang gno u mini figur gmuschtetet. es paar handgrife u scho si 3 paar hose bi mir ir kabine ghanget, eini schöner aus di angeri. hei, het di frou dietrich es flair, ds wüsse was mir gfaut u vorauem o passt. mir hei chli gsprächlet u i ha ihre mis leid wäg mine buuchrunzele klagt, das mi d hose aube zwicke u i nid chönn schnuufe weni der chnopf zue heig u d runzele überem hosebund use purzli. si seit… "ja wüsster, i bi äbe immer em hullere, jede tag machi das" … "heee was? was um aus i dere wäut isch hullere?" frage ig. eh hula hoop mitem reife ume buuch. si tanzet fröhlech vor mir, macht e kecke buuchschwung u zieht ihres t-schört chli ufe. heiii dä buuch, no mäng junge maa würd niidisch ab dene buuchmuskle vo dere luschtige, scho chli eutere verchöiferin. "das wär doch öppis für öich" meint si strahlend. i ha mini hose packt, zaut - si hei mi nid es haubs vermöge chostet - u bi i nächst sportlade ga nach eme hulla hoopreife luege.

vou motiviert bini dehei i dä ring gstange, ha mini hüft afa schwinge u NÜT, rein gar NÜT, isch passiert, dä schissring het u het nid wöuwe dobe blibe u di einzegi bewegig woni ha gmacht isch bücke u immer wieder ufläse, gsi. teu zeue ihri schritte pro tag, i bi scho mit bücke u ufhäbe uf paar hundert cho. verleidet isch er mir, dä ring. i ha ne churzerhand i egge gsteut u mer müesse igestah, dass das teil, öppe nüt für mi sig, wie so vieles im sport - bi haut doch eher der kreativ chopf u glich si si da, die cheibe buuchrunzele, rein dür zeichne u klavierspiele bringi die äbe äuä glich nid wäg.

nach ere guete summerphase mit wandere u ume thunersee loufe, woni haut mini paar kilos ds viu scho gmerkt ha, hets mi motiviert das gwichtsthema doch no mau chli nöcher a ds luege u näbscht em weniger ässe isch mer o dä hula-hoopreife wiede i d finger cho. schön würd er ja de scho no usgseh, farbig u handlech, so, dass me näbebi hurti chli chönnt ds füdle schwinge. i ha unzählegi videos agluegt, mit grosse, chline, dicke u dünne froue u gwüsst: I MUESS ITS DAS CHÖNNE. nach gfüete 1000 mau chli agäh hani gmerk, das isch zweni, zum dobe blibe bruucht das teil so richtig schwung. die womi kenne wüsse, weni öppis im chopf ha, de ziehnis düre, mit aune konsequänze u ja, its chunnt äbe die wauwurzsaubi i ds spiu. bim alege a churze blick i spiege - jessesgotttttt was isch de das das? mini beide späcksitene si chnütschblau um nid ds säge, praktisch schwarz. müessti zum döktu, chieme da sicher angeri verdächt i ds spiu u är wet wüsse, wär mi sooo zuegrichtet het. ha mer scho vorgsteut, wie ner würd ouge mache, weni  würd antworte, hmm, mi schön hula-hoopring 😂 i ha der gang i drogierie de vorzoge u nachere passende saubi gäge toui blöiele gfragt. its nach paar täg chräftig iiribe u chli schone, stah ig wieder i dä reife, gibe e toue aschub, spanne der buuch chli a (das chani nämlech itse), wippe hin u här u siehe da, är blibt DOBE. är dräit, ei rundi um di angeri u i johle u juble derzue, so dass lücu doch no angscht um di schlafende nachbare het - "mueter du hesch scho no ab weni fröid" meint er.

ja das hani u es fägt zu cooler musig chli chönne ds füdli ds schwinge, wieder einisch meh im läbe zeigts mers - eifach nid ufgäh, aus muess glert si!

härzleche dank für dä tipp frou dietrich!

wieder mau soooo e herrleche start i tag 🌄. ds früh ufstah ⏰ het sech allemal glohnt. bis mer dobe si gsi heimer bis ufe buur wonis im outo chrütz het niemer gseh. nach chli viu biischte u schnuufe, aber immer schritt 🥾 um schritt 🥾 simer de obe ufem leiterlipass 🏞 acho. dert isch d wäut no i ordnig, e ärdeschöne momänt😍 u ds glücksgfüeu überchunnt mi aube fasch weni so öppis gschafft ha. es isch für mi überhoupt nid säubschtverständlech - ändi 2010 het me mir nach x operatione gseit, si wüssi nid ob si das beii no chönni rette - u its geits uf sone tour 😍 nid grad wines jungs reh 🦌 bini ufe, das muess i aber o nid, bi weder es bärggängis tier no jung. schön langsam aber stetig. ha mini begleitig scho vorgwarnet, villech entwichi mir de ab u zue öppe e fluech, zum verwundere, isch das aber weder ihre, no mir passiert. dobe heimer i auer rueh brönschet u di wunderbari ussicht gnosse. früsch gstercht simer witer gstiflet, d babsle het sech aus chuehtribere 🐄gwüss no guet gmacht u sider ha ig ono mi obligat härzstei chönne sueche. nachem morgetepass hei mer der abstig unger d wanderschue gno. zwüsch düre simer chli i ds rütsche cho aber es het zum glück keni vo üs uf ds füdle gsetzt, einzig mini chnöi u er babsles zäie si bim abeloufe a ihri gränze cho. ds ersch heimer no e abstächer i gantrischhütte wöuwe mache je nöcher mir aber em parkplatz si cho desto meh hets nis o i die richtig zoge - irgendeinsch isch d energie wäg, furt, dusse usem körper u flügt nume no richtig heiwärts. e grandiosi tour, viu bewegendi idrück, its hurti chli chille uf der pouschtere u när saube wägem muskukater😂. merci babsle das mi begleitet hesch😘